កំពង់ឆ្នាំងៈនាព្រឹកថ្ងៃទី១៨ ខែតុលា ឆ្នាំ២០១៩ នៅសាលប្រជុំសាលាខេត្តកំពង់ឆ្នាំងគណៈបញ្ជាការឯកភាពរដ្ឋបាលខេត្តកំពង់ឆ្នាំងបានបើកិច្ចប្រជុំត្រួតពិនិត្យលទ្ធផលការងារប្រចាំខែតុលា ឆ្នាំ២០១៩ និង លើកទិសដៅអនុវត្តបន្ត និងផ្សព្វផ្សាយផែនការណែនាំរបស់ក្រសួងមហាផ្ទៃ និងក្រសួងកសិកម្មរុក្ខាប្រមាញ់់ និង នេសាទ។
កិច្ចប្រជុំនេះប្រព្រឹត្តទៅក្រោមអធិបតីភាពឯកឧត្តមឈួរ ច័ន្ទឌឿន អភិបាលខេត្ត និង ជាប្រធានគណៈបញ្ជាការឯកភាពរដ្ឋបាលខេត្តកំពង់ឆ្នាំងដោយមានការអញ្ជើញចូលរួមពី ឯកឧត្តមតំណាងអោយក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំកងកំលាំងប្រដាប់អាវុធគ្រប់លំដាប់ថ្នាក់ទាំងបី ប្រធានអង្គភាពជុំវិញខេត្ត អភិបាលក្រុង ស្រុក សរុបចំនួន១០៥នាក់។
ឆ្លៀតក្នុងឱកាសនោះ ពាក់ព័ន្ធនឹងសន្ដិសុខ សុវត្ថិភាព ឯកឧត្តម ឈួរ ច័ន្ទឌឿន អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្ត បានជម្រុញឱ្យគ្រប់បណ្ដាអង្គភាពទាំងទាំងកម្លាំង និងស៊ីវិលត្រូវគិតគូ និងគ្រោងដាក់ឱ្យមានកាមេរ៉ាសុវត្ថិភាពដើម្បីធានានូវសន្ដិសុខ សុវត្ថិភាពនៅស្ថាប័នរបស់ខ្លួន។ បន្ថែមពីនោះ ឯកឧត្តម ក៏បានអំពាវនាវឱ្យអាជ្ញាធរគ្រប់ជាន់ថ្នាក់ មន្ទីរជំនាញ សហការជាមួយកងកម្លាំងដើម្បីធានាសុខសន្ដិសុខ សុវត្ថិភាពជូនថ្នាក់ដឹកនាំជាន់ខ្ពស់ ឬថ្នាក់ដឹកនាំក្រសួងដែលអញ្ជើញមកខេត្តកំពង់ឆ្នាំង ឬធ្វើដំណើរឆ្លងកាត់ខេត្តកំពង់ឆ្នាំង។
ទន្ទឹមនឹងនោះ ដោយមើលឃើញពីផលលំបាក និងមានការយកចិត្តទុកដាក់ចំពោះប្រជាការពារភូមិ ឯកឧត្តម អភិបាលខេត្ត ក៏បានអពាវនាវឱ្យថ្នាក់ដឹកនាំក្រុង ស្រុក និងប្រធានមន្ទីរអង្គភាពគិតគូពីប្រជាការពារដោយវិភាជន៍ថវិកា និងសម្ភារ:តម្រូវការចាំបាច់តាមលទ្ធភាព។
ព្រមគ្នានោះ ឯកឧត្តម ក៏បានជម្រុញឱ្យស្នងការ ស្នងការរង អភិបាលក្រុង ស្រុក និងអធិការ ត្រូវពិនិត្យ និងថែទាំប៉ុស្ដិ៍រដ្ឋបាលឱ្យមានសោភ័ណភាព និងអនាម័យល្អ។ ឯកឧត្តម បានបន្តថា នេះផ្ដើមចេញពីការចូលរួមទាំងអស់គ្នា ជាកាតព្វកិច្ច និងការទទួលខុសត្រូវខ្ពស់ក្នុងការគ្រប់គ្រង និងថែទាំអង្គភាពរបស់យើង ព្រោះគ្មាននរណា គេទៅថែទាំឱ្យយើងទេ។
ឯកឧត្តម បានក្រើនរំលឹកបន្ថែមកុំឱ្យប្រព្រឹត្តខុសច្បាប់ ជាពិសេសការកុំឱ្យមានចូលរួមនឹងចលនាឧទ្ទាមក្រៅច្បាប់។ កាលណា ខុសច្បាប់ ច្បាប់នឹងចាត់វិធានការតាមផ្លូវច្បាប់ និងចូលរួមការពារធនធានធម្មជាតិ។
ដោយឡែក ឯកឧត្តម ក៏បានផ្សព្វផ្សាយអនុសាសន៍ដ៏ខ្ពង់ខ្ពស់របស់សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពាក់ព័ន្ធនឹងសន្ដិសុខជាតិ ការដោះស្រាយទំនាស់នៅមូលដ្ឋានដោយប្រើនយោបាយឈ្នះ ឈ្នះ និងការពង្រឹងសន្ដិសុខ សុវត្ថិភាពក្នុងដែនសមត្ថកិច្ចរបស់ខ្លួន។
